wanhoisecret

〈神奇女俠1984〉影評

Added 2021-02-20 09:56:03 +0000 UTC

戲院一開返，鳩衝去睇〈神奇女俠1984〉，首先我要表達前設，我是DC fans ，是WW fans，成長在80年代，而1984年更加是我人生最重要一年之一，所以我覺得成套戲好好睇，好合乎當時情況！

由於之前不少本地及外國觀眾劣評如潮，再次證明這電影是給予我這代人看的，並非給予新一代；不少人批判它左膠，首先DC漫畫一向左膠尤其80年代，內容不嬲大愛包容救細路；加上經歴越戰及反戰風潮，84年絕對是大家害怕世界大戰、害怕蘇聯、希望世界和平之世代，若果不了解1984年的狀況而批判電影左膠，是沒有見識！人哋已經刻意將時間定在84年並不是2014年，不就是這樣嗎？！仲鬧？！而不少人又話它女權主義，喂！80年代以及電視劇嘅神奇女俠，真係開宗明義係女權運動主義喎， 70年代女權意識慢慢抬頭， 80年代開始成為風潮，又比2020年嘅觀眾去批判1984年！點呀！

而電影當中真係有太多我嘅童年影子，美蘇嘅軍事競賽、霹靂舞、每星期電視播放嘅健身舞、腰包⋯⋯而且電影投射咗好多好多隱藏故事，包括列根總統的出現、星球大戰計劃、為咗核子末日災難秘密設置嘅weather mountain ，山中的白宮背景電視廣播系統，就係為咗災難之後，總統可以向全美國甚至全世界發射訊號廣播，我諗新一代真係完全未聽過！當然電影之中嗰位「壞人」，好明顯就係諷刺特朗普啦！

而全套電影都非常New Age ，例如許願石、邪神謊言設計、神秘力量、輪迴再生復活等等等等，呢啲其實都好少出現喺DC世界，就係因為80年代係整個世界尤其是美國嘅New Age興起嘅風潮，如果你完全唔知道呢個背景入戲院睇呢套電影，你真係可能會覺得九唔搭八，但係我哋呢一代人就睇到好投入好開心好滿足好80年代！I like it！

順帶一提，原本會以為點都有啲1984年美國洛杉磯奧運嘅內容出現，點知冇，但我都唔怪佢因為奧運會係用城市代表，當時華盛頓唔係舉辦城市，冇宣傳一啲都唔奇，但係佢標榜霹靂舞，當年奧運會就係其中用霹靂舞表演引起世界震撼！而且當時美國蘇聯關係極差，美國抵制1980年莫斯科奧運，所以後來蘇聯亦都抵制1984年洛杉磯奧運，知多啲背景會好睇啲！