【讀者分享🇦🇺】 宏福苑大火雪梨悼念活動
Added 2025-12-07 23:01:00 +0000 UTC為悼念大埔宏福苑嘅火災，全球各地嘅港人組織都相繼舉辦悼念活動。喺澳洲，澳港聯亦喺唔同城市設立街站，讓市民以自己嘅方式向死難者致意。雪梨嘅悼念活動於週六黃昏五點到七點舉行，選址在人流熙來攘往嘅 Town Hall。
英國有三千人冒雨排隊獻花；而喺雪梨，天氣剛好相反——原先預測會係 38 度嘅酷熱高溫，但天公作美，活動開始時氣溫驟降至大約 27 度，臨近尾聲更飄起微雨，恍如上天為呢場災難落下眼淚。不少香港人帶着沉重心情到場，向災民獻上祝福。
全程最後約有超過 700 人參與並獻花，大家排隊井然有序，充分展現咗香港人獅子山下精神。
我哋明白，呢場災難或許令旅居澳洲嘅港人深受衝擊，需要情緒支援。因此雪梨街站設有即場輔導服務，由一班有心嘅專業人士為受困擾嘅朋友傾談開解；同場亦有教會牧者，每半小時為香港獻上祝福與禱告。
作為身處牆外嘅香港人，我哋或許不在現場，但痛楚並冇因距離而減淡。喺屏幕上睇住熊熊烈火，不忍卒睹；心裡焦急居民能否及時撤離，也感受到深深嘅無力。慘劇之後，可能仍有朋友無法入睡，心繫失聯者、倖存者，以及失去家園與親人的家庭。
我哋知道，每一句安慰，都不足以撫平失去親人嘅痛；每一點燭光，也補償不了被烈焰奪走嘅生命。但我哋仍願意點亮手中嘅光，將呢份哀悼、呢份記憶，溫柔地送返屋企。
追悼會並非句號，而係一個提醒：提醒我哋不要忘記；提醒我哋仍要為真相發聲；提醒我哋，縱隔千里，依然心繫香港、記掛香港、為香港而心痛。呢場大火奪去超過一百五十條生命，也燒出了太多必須被回答嘅問題。未來嘅走向如何，我哋或許無力決定；但我哋能決定嘅係：不沉默、不冷漠、不讓呢場悲劇在歷史上被抹去。
願追悼會上每一盞燭光，都照亮黑暗；願每一份哀悼，都化成力量；願每一個港人，無論身在何方，都得平安。
Comments
但從心底祝平安🙏🏻
Li Kaifong
2025-12-07 23:25:57 +0000 UTC
