simonshen

【國際關係進階：讀者深度分享】「新香港換血記」：前線公立醫護的九點補充

Added 2021-02-05 14:36:00 +0000 UTC

對於沈教授嘅睇法，作為公立醫護嘅一員，想補充幾點：

1. 今次「獲認可的非本地醫學院」名單將會同新加坡相比，大部份都會係外國有名嘅醫學院，少部份會有國內嘅清華、復旦，但係係中西方逐漸對立，西方對香港角色越加懷疑嘅同時，又點會有牛津、劍橋畢業嘅醫生願意回流返香港公立醫院做牛做馬？何況送得呢班「香港永久性居民」身份嘅香港留學生，佢嘅父母不論政見，都想佢哋嘅下一代係外國發展，斷斷唔會走回頭路。

2. 美其名係吸引海外專才，除左因為政治關係，病症Spectrum 係有地域性嘅限制，好似香港有獨有嘅乙型肝炎同鼻咽癌嘅本土病，西方國家少有見之，亦都成為左異地醫生之間鮮有大規模移居工作嘅先天原因，唔係唔得，但係要作出一大番嘅適應同再學習，香港醫生去外國執業亦面對住同樣問題。

3. 除左病症spectrum 嘅不同，仲有語言係一大阻隔因素，香港雖然係國際城市，但係係公立醫院嘅病人大多數都係講廣東話嘅草根階層，尤其係老人家。你叫一個講英文嘅歐美醫生嚟香港執業係一大難度，所以咁多年以嚟，即使香港有輸入外國醫生，多數都係一啲較少需要接觸病人嘅前線科目，例如放射科、麻醉科、病理學等。你叫一個講英文嘅外國醫生係門診到一個下晝衝幾十個症，基本上無可能。

4. 咁好自然，呢個本身歡迎全球畢業於「獲認可的非本地醫學院」計劃，吸引到嘅自然只有嚟自北方嘅醫生，真正海外醫生根本少之有少，再加上「香港永久性居民」呢個資格，亦只有「單程證」或「專才輸入」計劃先可以輕易獲得，所以敢斷言個名單上絕大部份嘅醫學院都係虛，只有北方嘅幾間先係實。香港唔係新加坡，新加坡吸引到嘅醫護人才，基於上述因素根本不可能。

5. 除左清華、復旦，更重要嘅係盧寵茂係深圳謀算多年嘅「香港大學深圳醫學院」，多年嚟搵港大班教授上去任教，應該已經產出第一批嘅醫科畢業生，戴住香港大學醫學院嘅名函，地近香港，能操廣東話，先係計劃嘅最大源頭。而盧寵茂將會成為呢批新血嘅「恩師」、「座師」，長遠換血落去會係 de facto控制左醫管局嘅整個運作，並成為直正影響到香港醫生人才嘅第三間醫學院院長。

6. 成個計劃最值得深思嘅地方係規定「只可以係公營醫院工作，唔可以輕易去到私家市場私人執業」，呢個做法有幾個目的，首先係做出成個計劃只係為左補充香港公營系統嘅人手不足，以加強其正當性，以獲得建制、草根市民嘅支持；另外就係要減低私營醫護市場嘅反彈，要知私營醫護市場一直係藍營嘅中堅份子，醫學會副會長林哲玄就係當中嘅表表者，為免直接衝擊呢班私人市場嘅醫護利益，所以計劃只係集中係公醫管局。

7. 去年罷工嘅醫護嘅處理方法只係要「扣糧」結尾，以「以眼還眼」嘅作風，呢種輕輕放下嘅做法不成比例地輕，原因得一個，係疫情同醫護不足之下，無法即時作出報復性行為，只能夠大幅增長醫生嘅數量進駐公營醫院，先可以血洗「黑醫護」，以報去年罷工之仇。

8. 另外一個原因點解唔畀外來醫護直接出私人市場，係因為係私人市場，錢同客係有選擇嘅，作為一個消費者，你會相信係診所門口個水蛇春咁長嘅名牌係寫住「英國皇家外科醫學院」定係「上海交通大學醫學院」嘅畢業醫生？呢個問題自己答。但係私人市場以競爭為主，操普通話嘅海外醫生根本唔能夠同香港本地嘅醫生係私人市場到競爭，開唔開放分別不大。

9. 但係長遠嚟講，擁有專科牌照嘅本地醫生就會慢慢流出私人市場，留低嘅位置就為北方精英替代，而醫管局係擁有一個非常重要嘅權力，就係醫管局轄下嘅公營醫院係香港唯一認可可作專科醫生訓練嘅地方，而專科訓練至少係實習後六年。除此之外，無一間私家醫院或組織擁有呢方面嘅權利。而掌控左邊個可以接受邊方面嘅專科訓練長遠將會成為一大挾制香港士子嘅權力。係香港本地兩間醫學院畢業嘅尖子，抱住濟世為懷之心，胸懷民主自由之價值，為左自己長遠嘅發展專科訓練機會而噤聲或被收編？答案不言而喻。