【讀者分享】白色恐怖梗有一個喺左近
Added 2023-01-09 12:01:02 +0000 UTC呢篇分享我唔打算喺自己嘅部落格刋出，因為已經係第N次俾家人打電話嚟勸喻，叫我喺我嘅Facebook page度唔好再咁「激進」，然後就一大堆理由（下刪一萬字）去理順或者解釋佢哋嘅「好意」，再三規勸我唔好再喺網路上邊撰寫任何批評香港政府或者共產黨嘅文章。我已經唔係第一次作出下面嘅分享，由於事情新鮮滾熱辣，我都喺度同大家開心share今次家人嘅理據。
呢次長輩嘅理據係話我哋都只不過係一啲小薯仔，無謂做到咁偏激。佢話呢個世界山水有相逢，你點知你有冇邊一日會返嚟香港，唔好講到我咁決絕。佢話要記住仲有屋企人喺香港，而家網絡世界發達，好容易查到係邊個，叫我都要為其他人着想一下。佢更加話香港既然已經回歸，就一定需要背靠祖國，就算幾唔happy都冇得選擇。再加上政治嘅嘢大家識條鐵，一班政棍可能到最後都係互相利用，勸我唔好太過偏向一方，應取中庸之道。
這位長輩相對比較開通，接受意見，我同佢講既然我已經身在外地，如果連呢啲咁小小嘅言論自由都要被剝奪嘅話，走來做乜。另外，我亦都表達，佢咁樣講係咪即係表示佢哋而家喺美麗新香港已經變咗「人質」，萬一我嘅身份被曝光，佢哋就會被政權打壓？咁嘅話同中國大陸有咩分別？香港政府仲點樣去自圓其說話一國兩制仍然存在？
我相信我唔係唯一嘅一個。
有朋友返香港要開鬼機、刪Facebook 清 WhatsApp；有朋友事先張揚話會返香港，講到明會退出組群，返咗嚟先至再重新加入為免拖累大家，亦有朋友勸喻，叫我暫時都係唔好返香港。如果你話俾我聽咁都叫做「香港而家好好咩事都冇」，就真係搵鬼信。
我明白長輩咁樣講都係出於一番好意，喺今時今日咁樣嘅環境，一班已經離散嘅香港人，若然個個都好似俾人摙住條頸咁唔願意去發聲，香港嘅墮落，又豈止一日千里吖。
I won’t back off。
▶️ 政治漫畫家黃照達教授：下半生在英國只做一件事：重建真香港人身份認同（下）
https://www.youtube.com/watch?v=V-0Z3AppI2Y
