【我的香港回憶 568】讀者分享：戰前皇仁舊生的故事
Added 2023-06-28 15:01:02 +0000 UTC以下分享來自讀者黎先生，獲授權這裏節錄和皇仁相關的部份分享：「得知教授最近常寫皇仁書院故事，本人2021年尾，寫了一個家族口述本人爺爺-皇仁畢業生的故事，是第四十八屆青年文學獎粵語小説公開組（2021-2022）季軍」。
************************
// 香港社員（1900-1985）
我記得嗰日係一九八五年六月，我同仲陀緊你嘅老婆喺大口環最後一次探你阿爺，即係我老頭子，佢個名叫熾垣。
今日老頭子嘅精神特別好，可能因為今日我老婆終於見肚，尤其你啊媽將照到係仔嘅消息話咗比你阿爺知嘅時候。
老頭子開始打破佢嘅沉默，自從中咗風之後，佢竟然一改以前嘅寡言作風，或者因為我同老頭子從來冇獨處過嘅機會，我同佢唯一嘅日常對話-就係細個返學前去佢飲茶嘅地方，分佢半個雞球大包嗰幾句嘅客套話。
估唔到老頭子中風嚟咗大口環療養院之後，都捉住我傾偈。我亦都不知不覺間慶幸將大仔帶去俾隔籬鄰舍湊，咁就可以好似今日咁過海嚟聽故仔。
但今日佢無再重複當年港督戴麟趾嚟明華大廈探我哋嘅經歷，佢講返上次以前好少提起過-由佢細個去到三年八個月嘅日子…
香港社員主人翁「熾垣」敍述開始：
《童年》
「我阿爹二十歲就由南海嚟到香港投靠家姐一家，即係我姑姐姑丈。我細個對阿爹嘅最大印象就係每一次入佢房門嘅時候，佢都叫阿娘或者妹仔閂埋道門，唔俾大哥同我睇到佢食鴉片煙。
姑媽每次好嚴肅叫我嘅時候，每次都好驚，因為知道要拎屋企啲古董落山典當。 你嫲嫲即係我娘同埋姑媽都係官太太，全部紮腳嘅，雖然你阿嫲由細到大都照顧到你哋大都冇問題，但要紮腳嘅拎住古董行落山同埋女人去當舖，始終唔係咁妥當。
由最開始「盡當吖老闆！」…到我一行入去當舖嘅時候，老闆就開閘招呼我入去飲茶。老闆同佢幾個夥計對我當時呢個細路態度好友善，我喺呢度學識同大人談笑風生，亦都學識咗講價，因為基本上都係斷當。
每一次拎完錢俾姑媽，一兩個鐘之後就會有人拎鴉片上嚟屋企。當時嘅屋企位置係喺山中間近山腳，亦都好近我讀嘅官校。
之後我就憑住獎學金入讀當時人稱大書院嘅皇仁書院。當時唔少華人同學，都係搭二人橋返學，好似何世儉同學。而我當時就同其他族裔嘅同學一樣，都係行路返學。由第八班讀到去第四班即係第五年嘅時候，我哋就一路越搬越低，最後離開左姑媽姑丈搬到去電車路附近住，而且仲係喺灣仔，有時要行路返學，我記得嗰條路真係好遠好遠。
沿住海傍一路行到德輔道中，我就當自己係一架電車咁行，跟住轉左一路上山，鴨巴甸街呢段係最辛苦，但每次放學返屋企，就最鍾意喺呢段路跑落嚟，係最舒服同開心。
當時皇仁書院校刊《黃龍報》，係每位同學一出就爭住睇嘅刊物。當時大家都尊孫中山先生為我哋偶像，讀高中嗰幾年，好多文章都係講民國嘅戰況，雖然我哋成班華人同學都唔會番廣州讀書，但我哋都想我哋嘅學長做返大總統。我哋大部份華人同學都唔去考牛津試，首先走去考當時香港大學西醫書院入學試。
只係我當時最努力讀都係商業同埋數學，因為我知道畢業之後，就要養家。
讀書呢八年裏面，我最鍾意就係喺書院三樓走廊盡頭望落去荷李活道，景色真係一覽無遺，下面有八九棵冬青樹，仲可以望到去電車路。
其實我期待養家嘅，因為知道出嚟做嘢之後，我就可以照顧爹娘，同埋減輕大哥嘅負擔。尤其係爺爺一家喺南海早幾年已經辭官退休，叔伯們雖然全部都已經剪咗辮，但對於前清官員，政府依然係唔會重用。
....... （與皇仁相關部份結束）//
▶️ 李龍鑣：我在汪精衛政權下生活的日子
https://www.youtube.com/watch?v=NdC-4SWxxpk
