【我的香港回憶 574】讀者分享：戰爭後期的慘烈歲月
Added 2023-07-04 15:01:02 +0000 UTC這是讀者黎先生的皇仁戰前舊生口述歷史的二戰最後部份，講述的是日本開始戰敗之時，反而是香港人面對的最艱難日子，糧食嚴重不足，而且要面對盟軍的空襲，成功渡過一劫的人，戰後都有無比韌力。
//去到一九四五年，你嘅三哥同細佬亦都各有一段瘋狂嘅經歷。
可能因為冇嘢食或者加埋病啦！你細佬有一次屙咗半條腸出嚟，當時我唔在場，你老媽子同埋阿嫲即刻同佢塞返條腸入去。之後幾個禮拜餵佢食番稠啲嘅粥水，成個身子都慢慢改善，果段日子佢再屙再塞多幾次，最後冇事，哈哈！
嗰陣時真係太肚餓啦！我班日本上司，四五年開始都冇一個有飽飯食。
最可惜係住喺對面嘅鄰居，最初係個細女，跟住兩個老人家，之後兩個仔，都監生餓死左。
最後爸爸張先生係吊頸死，因為佢老婆都病死埋。四四年後醫院根本唔會醫呢啲營養不良嘅中國人。
我記得係佢個女死之前一個月左右，張先生最後一次問我哋借米，我仲親自帶佢入去睇我哋個米缸，其實都係冇米…
另外你三哥就厲害喇！四五年美軍開始空軍轟炸我哋香港。佢一聽到警報聲，就一枝箭咁衝咗出去睇炸彈，佢同我講番：「我打大赤腳走上山上面，其他人就反方向咁走返屋企。但每次都炸我唔死，上山嘅時候已經有一條條屍喺條街度，但我好有信心，因為之前睇咗幾次，就發現炸過嘅地方，係唔會再炸，越多人死嘅地方就越安全。」
上山睇飛機掉炸彈，成為咗佢最大嘅樂趣。
佢呢段經歷亦都係我哋一家回想起三年八個月，唯一嘅樂趣，雖則嚇到你老媽子同埋阿嫲鼻哥窿都冇肉！//
▶️《軍武庫》版主David：華格納集團「清君側」兵變，其實是1936年日本皇道派「226事變」翻版
https://www.youtube.com/watch?v=YDoJTXeLVVw
